تنظيم ههههههههههههههه الدولي لوائل غنيم

خلال تجربتي القصيرة في الحياة (أنا مش هاعيش دور الخبرة العجوز يعني) كنت دايما باحاول مبقاش تفكيري نمطي وامشي مع التيار .. كنت دايما باسال نفسي سؤال: هو ايه لازمة الانسان لو كل اللي بيعمله من ساعة ما بيتولد لحد ما بيموت تقليدي ومرسوم له بدقة من ناس حواليه ..

 بيتولد ويدخل المدرسة وينجح واهله يختاروله زوج او زوجة ويخلف عيال ويشتغل موظف لحد ما يموت .. التاريخ اساسا لا يذكر التقليديين الا كاعداد في الامم واغلب اللي ذكروا في التاريخ في لحظة كانوا ناس مجتمعاتهم بترفضهم في البداية ولا تعترف بيهم بل بتعتبرهم مجانين .. وبسبب محاولتي الدائمة للتفكير بشكل مختلف كنت باتعرض لمواقف كتيرة من ناس أطلقت عليهم تنظيم "هههههههه" الدولي .. 

أعضاء التنظيم كل دورهم في الحياة هو السخرية من كل واحد بيحاول تغيير نفسه وتغيير من حوله .. الاستهزاء بكل من يجتهد أو يجرّب أو يتحدى الواقع اللي بيعيش فيه .. وأعضاء التنظيم ده بيتميزوا بنوع من العزيمة الإحباطية يُحسدوا عليها .. عضو التنظيم ده بيبقى كائن مُحبَط ومش عايز يعمل حاجة في حياته فبيتحول مع الوقت لكائن مُحبَط ومُحبِط .. بينشر فايروس الاحباط لأنه من الضروري كل الناس اللي حواليه تبقى زيه عشان ميحسش ان فيه حد أحسن منه .. فبيبدأ بشكل لا إرادي يسخّر كل قدراته العقلية في ازاي يسخر ويسفه من كل حد بيحاول .. 

 علاقتي مع تنظيم "ههههههههههه" الدولي علاقة ليها بُعد تاريخي قديم .. لأني لسبب او لآخر عملت حاجات كتير في حياتي عجيبة .. قررت اتجوز من وانا عندي 18 سنة وبعد محاولات خطوبة باءت بالفشل اتجوزت انا عندي 20 سنة .. مراتي كانت اجنبية مش مصرية .. اشتغلت من وانا في ثانوي عشان ادفع فاتورة التليفون بتاعة الانترنت .. ورُزقت ببنتي إسراء وانا في تالتة جامعة .. كنت المدير التنفيذي لشركة كبيرة فيها 120 موظف من اهم الشركات اللي بتقدم اخبار البورصة في العالم العربي وأنا عندي 25 سنة .. ومسكت المدير الاقليمي للتسويق في اكبر شركة انترنت في العالم وانا عندي 28 سنة .. وصرفت 80% من الفلوس اللي كنت محوشها وانا عندي 24 سنة عشان اخد ماجستير ادارة اعمال .. وحاجات تانية كتير .. 

 في كل مرحلة في حياتي كنت باواجه عدد لا باس به من اعضاء التنظيم دول .. أقارب أصدقاء زملاء دراسة وحتى ناس في الشارع (على الاقل دلوقتي بعد الثورة بعد ما وشي بقه من النوع المالوف) .. رؤيتي لاعضاء التنظيم ده دائما بتكون دافع اقوى للاصرار على الانجاز .. وعدم الاستسلام للواقع اللي هما حبسوا نفسهم فيه .. بقول لك كل ده ليه على المسا (شايفك ياللي بتسال تحت)؟ عشان احنا في بيئة دسمة اليومين دول شغال فيها تنظيم "هههههههههه" الدولي بكل قوته .. فحبيت ادعو تنظيم "هههههه" الدولي لتقنين اوضاعه ويحل عن سمانا :) واللي يقول لك "ههههههههه" قول له: "خخخخخخخخخ" تصبحوا على خير وأمل :)

by
وائل غنيم