لو سمحت أنا لسه عامل اوردر من عندكم بس فيه مشكلة .. - خير يا فندم ..
- أنا طالب الوجبة ال١٢ قطعة لكن اللي وصلتي ٨ قطع بس ..
- ازاي ؟.. أكيد فيه حاجة غلط .. خليك معايا .. ( تمر نصف ساعة انتظار ثم يعود )
- طب لو سمحت كده ممكن تعدهم تاني ؟ - ده على أساس إني مبعرفش أعد لحد ١٢ ؟
- معلش يا فندم مرة كمان .. - حاااااااضر .. أهو ١ ٢ ٣ ٤ ٥ ٦ ٧ ٨ .. وبعدها العلبة فاضية ..
- طب معلش .. ممكن تجرب تقفل العلبة عليهم وتفتحها تاني ؟
- مين ؟! - اقفل العلبة وافتحها تاني .. - حااااااضر .. أديني قفلتها وفتحتها تاني .. برضه ٨ ..
- غريبة .. طب معلش خليك معايا .. ( تمر ساعة إلا ربع انتظار ثم يعود )
- طب علبة الكول سلو .. بتفتح وبتقفل طبيعي ؟ - مجربتش .. - طب جرب كده ورد عليا ..
- حااااااضر .. أهي .. بتفتح وبتقفل عادي .. وعلبة البطاطس كمان شغالة ..
- طب خليك معايا ثانية واحدة .. ( تمر ساعتين انتظار ثم يعود )
- طب احنا راجعنا الأوردر عندنا ولقينا انك طالب ١٢ قطعة ..
- بالضبط .. وجالي ٨ .. عايزني أجرب ايه المرة دي .. ألبس الكيس على دماغي وأنزل اجري ملط في الشارع ؟
- لأ حضرتك هي حاجة أخيرة .. جرب كده تحط على القطع الموجودة كاتشب ..
- باقولك ايه .. شوفلي حد كبير أكلمه ..
- معلش يا فندم .. طب .. طب ممكن ترجع كل حاجة الكيس وتستنى خمس دقايق بعدين تخرجهم تاني ؟
- ثانية واحدة .. أنا عارف صوتك ..
مش انت وائل بتاع تي اي داتا ؟ - أيوه أنا .. بس سبتها خلاص وبقيت باشتغل في كنتاكي ..
- مش تقول يا راجل .. خلاص كده أنا مش عايز حاجة .. كفاية ٨ قطع ..
- شاكرين جدًا لإتصال حضرتك وفي انتظار مكالمتك الجاية !
0 التعليقات:
إرسال تعليق